ПӀур

ПӀурыр зыпӀурэ цӀыф. Шъэожъые е пшъэшъэжъые цӀыкӀухэр янэ-ятэхэм аӀызыхэу зыпӀущтыгъэр, зыгъасэщтыгъэр ары. Аталыкъ - пӀyp Ӏофыр ижъкӀэ къыщегъэжьагъэу адыгэмэ ахэлъыгъ. Ухэукъощтэп адыгэ шэн дэхэ зехьаным изэхэгъэуцонкӀэ аталыкъ хабзэм ишӀогъэшхо къэкӀуагъ пӀомэ. Ятэ-янэхэм анахьи аталыкъхэм нахьыбэ къадэхъущтыгъ сабый пӀун-гъэсэнымкӀэ. Аталыкъ Ӏофыр гъэсэпӀэ чӀыпӀэ шъхьаӀэу адыгэмэ яӀагъ. ПӀун-гъэсэныгъэмкӀэ гъэхъэгъэшхо адыгэмэ зэряӀагъэр къегъэшъыпкъэ нэмыкӀ лъэпкъмэ ащыщэу пӀурыбэ Черкесием зэрыщапӀущтыгъэм. Аталыкъ Ӏофым нэмыкӀ шӀуагъи къыкӀакӀощтыгъ. Лъэпкъ зэгурыӀонымкӀи ар тегъэкӀапӀэу щытыгъ. Аущтэу зэрэхъуным пае ежь адыгэхэми якӀалэхэр аратыщтыгъэх нэмыкӀ лъэпкъмэ арагъэпӀунэу. ПӀурхэм ащыщыбэхэм къафагъэшъуашэщтыгъэ зыпӀугъэхэмэ агъэлъэпӀэрэ цӀэхэу хъан, бек, султӀан, тэгъэур зыфэпӀощтхэр.